رسم المخ
تحد الأستاذ الدكتور عمرو حسن الحسني أحد أشهر أساتذة المخ والاعصاب بمصر و الشرق الأوسط رسم المخ و إمتي نعمله و إمتي لأ.. عشان موضوع رسم مخ لكل مواطن ده مستفز جدا .. و كل كشف معاه رسم مخ ده أكثر استفزازا
أ- إصرار البعض من أطباء المخ و الاعصاب و غيرهم من بعض التخصصات علي طلب رسم مخ للمتابعة في كل زياره لمريض التشنجات لا يوجد أي أساس علمي له.
الرسم بيتعمل فقط في الاول للتشخيص و ممكن في الاخر في حاله الرغبه في سحب العلاج .
ب- طبعا ممكن لطبيب المخ والأعصاب إعاده عمل رسم المخ مره تاني لو مثلا الرسم الاول كان غير دقيق او عاوز يضيف تقنيه معينه أو عاوز يطول مدة الرسم لكن انا باتكلم علي اللي بيعملوه كل زياره بشكل روتيني..مفيش حاجه اسمها متابعه نسبه الكهرباء ..آه و الله مفيش حاجة اسمها نسبة الكهرباء .. أنا عارف إني بألعب في الثوابت بس معلش هي كده الحقيقة مُرة متابعه حالات التشنجات بيبقي اكلينيكي بدون داعي لعمل رسم مخ بشكل متكرر
ج- تشخيص الصرع و اضطراب كهربيه المخ تشخيص اكلينيكي بالدرجه الأولي يعني بيتعرف بالكشف و سماع شكوي المريض ...أما رسم المخ مجرد أداه لتأكيد التشخيص و ربما معرفه epileptic syndrome
د- ١٥ % من الناس الطبيعيه عندهم تغيرات في رسم المخ و اعتبار هذه التغيرات كهرباء زائده و كتابه أدويه كهرباء دون وجود تاريخ مرضي لحدوث اغماءات او تشنجات هو نوع من الممارسه الطبيه المغلوطه
ه- دي أمثلة لبعض الحالات اللي لا يجب تشخيصهم كهرباء زايده بالمخ و لا يجب إعطاء أدويه كهرباء لهم ولا يجب عمل رسم مخ لهم
1- طفل كل ما يعيط يزرق و يخشب ونفسه يتقطع و يغيب عن الوعي ده مش كهربا زيادة
دي نوبات احتباس نفس
Breath holding cyanotic spells
2- طفل كثير الحركه، قليل الانتباه و شقي جداً ده عنده فرط حركه وتشتت انتباه
ADHD
3- طفل عنده بربشه بعينه الاثنين وحركات في رقبته ووشه ده عنده حركات لا إرادية وغالباً لزمات حركية TICS
4- طفل أول لما يتخبط أو يقع يقطع النفس ده مش كهربا زيادة
دي حاجه اسمها pallid syndrome
5- طفل مش بيكلم حد وعنده صعوبات في التواصل و التفاعل والتجاوب مع المحيطين و متأخر في الكلام مع حركات نمطيه تكراريه
ده طيف توحد Autism spectrum disorders
6- طفل مش بتيجي له التشنجات الا مع الحرارة كل مايسخن يتشنج بس عمره أقل من 6 سنين ديه تشنجات حرارية
Febrile convulsions
7- طفل مش بيركز في المدرسة وانتباهه قليل وعنده مشاكل في مواد معينه ديه صعوبات تعلم
Learning disability
8- طفل بيخبط دماغه في الحيط أو في السرير كتير قبل ما ينام كذا مره ومينمش الا لما يعمل كده ديه مش كهربا زيادة دي حاجه اسمها
Head banging
9- طفل بيصدع و مع الصداع دوخه و زغلله و ساعات ترجيع و اشعه المخ سليمه و قاع العين سليم .. دي مش كهرباء .. ده صداع الشقيقة
Migraine
10- طفل رضيع ساعات بيبص بعينه لفوق ويعلق عينه لفوق لمدة ثواني وخاصة مع الرضاعة ديه مش كهربا زيادة دي حاجه اسمها
Paroxysmal tonic upward gaze
